Prif athroniaeth a diwylliant cwmni Seren yw mai’r defnyddwyr gwasanaeth sy’n hollbwysig ac y dylai popeth arall droi o’u cwmpas nhw. Mae’n ymwneud â nifer o bartneriaethau, yn lleol, yn rhanbarthol ac yn genedlaethol. Mae’r cwmni, sydd wedi’i gofrestru gydag Arolygiaeth Gofal Cymru, y corff sy’n arolygu perfformiad ac ansawdd gofal yn rheolaidd, yn gweithio’n agos iawn gydag adrannau gwasanaethau cymdeithasol Cyngor Gwynedd a Chyngor Conwy. Mae 50 o ddefnyddwyr gwasanaeth yn cael cymorth rheolaidd.

Arferai Blaenau Ffestiniog fod yn gymuned chwarel lewyrchus ond gyda diflaniad y diwydiant hwnnw, dirywiodd y boblogaeth ac yn ei sgil daeth y problemau economaidd arferol. Mae’r cwmni’n chwarae ei ran yn y gwaith o adfywio’r ardal yn economaidd ac yn gymdeithasol yn cynnwys darparu gwaith i 60 o bobl. Mae’r rhan fwyaf ohonyn nhw’n byw’n lleol. Mae dros £1miliwn yn cael ei fuddsoddi yn ardal Blaenau Ffestiniog, rhwng cyflogau eu gweithwyr, a’r nwyddau a’r gwasanaethau mae Seren yn eu prynu’n lleol. Mae’r dref yn datblygu’n gyflym fel canolfan gweithgareddau awyr agored sy’n denu ymwelwyr o bob cornel o Ewrop erbyn hyn. Mae’n brolio cynnal rhai o'r prosiectau twristiaeth mwyaf uchelgeisiol yng ngogledd Cymru. Mae Seren wedi sicrhau bod defnyddwyr ei wasanaeth yn rhan gyfannol o’r gymuned fywiog yma sy’n datblygu.